1. Pathian in nuam isak ding deihlou ahi.
Dawnna: Tulai in India leh gamdang khenkhat ah sahkhua kulmut pawl om in, amau khotang a omdan hoihlou dou leh culture kembit kichi in Valentine’s Day chih khawng chiang in nungak-tangvak kingaite kiheelna mun deuhte khawng dapkual in, mi ki-it a kikawite khawng su mualphou in, vuak pawl bang nei mawk uhi. Amau deihdan a omloute a utdan ua omsak utlou in, amau deihbang in vaihawm sawm ua, kuamah in leng kham ngamlou a bang hi. Hiai bang mite media khawng ah “Moral Police” chia minvuah in om uhi.
Hiai bangdeuh in mi tamtak in Pathian leng I omna uh galaxy laizang a ding a, hiai “Moral Police” te bang a ama ut dandan a vai hon hawmkhum ziauziau lel bang in ngaihtuah uhi. Midangte hon muhlouh lai ale honmu gige ahihman a “Het! Nang pa, laizial tepgu dek maw… khawl ouh!” “Na video etdek a thangtatna tel hilou maw… enkoh!” “Eh! Huai a lamkawina tak a kikawi tantante, kikhah chet uah!” “Omdan hoih in om diamdiam uah, a huchih kei leh hon zahlak sak ding kahi; hon mu gige kahi,” chidan a Pathian in mihingte hon vaihawm khum ahi chih ngaihdan a hat mahmah khat ahi. Sappau in Pathian kha “The Cosmic Killjoy” bang chi ua, pau vantang deuh a gen ding hile hang “spoilsport” – mi nuamtak a omsak theilou/utlou chidan in ngaihtuah uhi.
Alehlam ah, Setan pen kha mi polhnuam mahmah, I nopsak ding deih, hon khahzantu dan a ngaihtuahna om hi. “Moral Police” te dan hilou a, restriction bangmah omlou a, I duh ne/dawn a, I ut leh lumkhawm mai a, I et utte ensuk mai dia hon zalensaktu dan a pomna a om sek hi.
Himahleh hiai pen theihna dik ahikei hi. Zuau ahi.
Setan in nuam nasak leh saklouh a khual zenzen kei hi. Eden huan a gul bang in thudik kimkhat zang in hon nekmang a tum hi. 1 Peter 5:8 in Setan hihna a genchiang mahmah hi: “Pilvang unla, limsak un; na melma uh Diabol, humpinelkai humham bang in a nektheih ding zong in a vial vakvak hi.”
I chian sem nang in: Gam Siangthou chih a om Israel/Palestine gam ah tourist honkhat vazin ua, tour guide khat makaih in mun minthang tuamtuam vehkual uhi. Khopua deuh munkhat a apai lai un hiai a makaihtupa’n “Lawmte, nou gam khawng a belamching ten a belamte uh a nunglam apan hawlthoh uh hia, hiai gam a tuamna tuh belamchingte’n a belamte uh hawlthoh lou in amailam a makaih zaw uh ahi” chih gen hi. A gen khit sau pai nailou in belam honkhat hongpai ua, a chingtupa’n a nunglam ua pan hon hawl hi. Huai a muhtak uh tourist ten le lamdang a sa ua, a makaipa un leng zumhuai sa in, etna ding theilou in om hi. Huchia kipaipel di dinmun a a omlai un, hiai Tour Guide pan lamdang sa ahihman in belamchingpa kiang ah “Bang chidan e nang belamching dangte banglou in na belamte non hawlthoh mawk a?” chin va dong khialkhial hi. Huaitak in hiai belamchingtu pen in “Aw, lamdang nasak theih mah ahi. Aziak tuh kei belamching (shepherd) hilou inga, sagoupa (butcher) kahih ziak ahi” chi in dawng hi.
Setan in I nopsak ding deih a, I ut dandan a hon omsak I chih khak zenzen leh, a tawpni a hon goh dia hon vakthau masa lel ahi chih I theih ding ahi. Mikhial ihihziak a I utpente zang a hon kolbuh (chained) ahi chih I theih ding ahi. Nuamsa ikisak kal a saltang ana kihi lel ahi. Tamtakte a kikhel gawpma in saltang ahihlam uh kiphawklou ua, lungzinhuai in hehpihhuai uhi.
Hiai toh kisai I Toupa Jesu ngei in leng chiangtak in Johan 10:10 ah ana gen hi: “Guta zaw, gu ding leh hihlum ding leh hihse ding lou in a hongpai kei; kei zaw hinna a neihna ding ua, tampitak a neihna ding ua hongpai kahi.” Setan zaw guta bang a neksiat ding zong a vialvak ahi a, Pathian ahihleh belamchingpa hoih, a belamte tangtawn hinna lampi a makaih a, amaute adia a hinna pia Pathian ahi. Pathian in nuam I sak ding deihlou ahi zenzen kei hi. Khelhna ziak in I utdante, I duhte a hoihlou lam ah kawivek a, huaiziak in Pathian deihdan thei a, kithunun zou tak a nuam I sak ding Pathian deihlam ahi. Hiai khovel a I khelh utnate Ama ziak a I thunun a, siangthou hinkhua I zat leh I maban a nopna tengteng ei a ding a sehkholhsa ahi chih I theih ding ahi. Pathian in nuam I sak ding a deih hiphetlou in, kiningching tak (in abundance) a nuam I sak ding a deihlam ahi. Tua kiningching tak a nopsakna ding pen khovel hun tomchik sung a nopsakna ichihte utoh kikhen (trade) ding phal mahmah kei ni.
Gingtute, theihkhial hetlou ding in pilvang ni aw.
“Nang hinna lampinon theisak ding a; na ma ah nuam dimletna a om hi; na khut taklam ah khantawn kipahna ding a om hi.” (Sam 16:11)
Leave a Reply