DOTNA: Vangam ah I zi/pasal, tanau lainate toh leitung a ikitheih bang in ikithei lai diam? Ahihkei leh, kitanau tuam omlou a, dinmun kibang, sep kibang a om diamdiam maita ding ihi diam?

DAWNNA: Mihing suangtuahna pansan a ngaihdan mawk gen hilou a, Laisiangthou pansan a I suut chiang in, vangam ah leng leitung a I it leh ngaihte toh mel kitheituah a khosa ding ihi chih Laisiangthou sinsakna ahi ichi ngam hi. Bangziak a huai chi ngam ihi hiam chih I etsuk ma in, sihna a hongtun chiang a thiltung ding I theihsiam masak a poimoh hi. Huai tuh bang ahi dia le:

Sethei pumpi a sih chiang a se theilou pumpi piak a om ding ihi.

A thou nawn taksa toh kisai 1 Kor. 15: 52-54 ah chiangtak in Sawltak Paul in Pathian theihsak in ana gelhkhin hi. I taksa pen sithei apan sitheilou, muat thei apan muat theilou a khen a om ding ahihdan a chiang hi. Hiai tang pentak bel laktouhna (Rapture) toh kisai a kigen himahleh, Rapture tunma a gingtu site a ding in leng dikvek thou hi. 1 Kor. 15:47 khawng I et nawn chiang in leitung a I dam sung Adam bang a taksa sithei nei ding hang a, himahleh I sih nung chiang a, a thounawn sapum I neih ding pen bel Adam taksa bang hi nawnlou a, a thounawn Jesu Khrist a bang hita ding ahihdan sinsakna I mu hi. Hiai thounawn sapum (resurrected body) pen bang chi bang hiding hiam chih pen hundang adin I koih ding a, himahleh tomchik a gen in chu tulel a I sapum toh teh nadan omlou ding (incomparable); vak ding (illuminated), hatlouhna, damlouhna, khelhna chihte hihbuai a omnawnlou ding (incorruptible), leh khut a khoihthei thil tuamtuam ten noksak nawnlou ding (unrestricted) ahihdan thei masa peuhmah le…

Achihleh huchi bang a khovel a I omlai toh kibang hetlou a omta ding, Pathian phat denta ding, sa leh sisan I hihna beita ding ahihleh, hiai leitung a I kitanaunate om nawnlou ding ahi diam? A kitheituam chihte omlou a, inkuan khat bang a omkhawm vekta mai ding ihi diam? Hiai dotnate hih dotna poimohtak ahi. A bul a I gensa mah bang in, Laisiangthou sinsakna hi a I theih bel, vangam ah I leitung kizopnate apoimoh masa hi nawnlou hial ding himahleh, “hiai ka nu/pa, ka zi/pasal, tanu/tapa ahi” chi a kitheihtuahna bel omlai tham ding ahi chih ahi. Laisiangthou pansan a hiai I gen ngamna ziak bel:

1. Kumpi Saul in dawi-aisansiam zang a Samuel a houpih lai in, a sisa himahleh a mel leh puam a thei mahmah lai hi (1 Sam. 28:8-17).

2. A tapa naungek a sih in Kumpi David in amah kei kiang ah hong pai nawn ta kei ding a, kei amah kiang ah ka pai zaw ding, ana chi hi (2 Sam. 12:23). Hiai a Pathian lawm a theih a om David in sihnung ding vaai (afterlife) a lametna a chiang mahmah hi. Huai tuh: a tapa toh mel kimuh nawn ding lamen in kikhamuan hi.

3. Luke 16:19-31 a Lazar leh mihausa tangthu ah, sih nung a paradise a omta Abraham leh Lazar, banah gawtmun a omta mihausapa te kitheituah mahmah uhi. A kitheihtuah kia uh hilou in, khovel a a khosakna tan uh thei mahmah uhi.

4. 17:3-4 a Mellamdanna Tang ah kum tampi mahmah paisa a ana sikhinta Mosi leh Elija te hong kilang ua, Jesu nungzui Peter, Jakob leh Johan ten a thei mahmah ua, a min un lou geihmai uhi. Mosi leh Elija lah amau pianma tham a sikhin hita ua, huai hunlai a limlak khawng lah omlou dia, bangchi dan a nungzuiten thei uh ahi ding chih dotna om thei hi. Vangam ah I inkuante, tanaute, lawmte I thei tham ding a, himahleh huai hun chiang a thil bangkim (I theihnate natan in) bukim leh hoih vekta ding ahihman in, gingtu vangam kai khempeuh kithei tuah in, inkuan khat bang in ki omta ding chih hiai apan leng ziltheih om in I thei hi. Fanny J. Crosby bang leng laa phuaktu minthang tak ahi a, himahleh a mitdel hi. Mit a kuamah mulou himahleh khalam mit a hak in, lametna hing toh hiai laa ana gelh hi:

“Mel in thei ning, mel in thei ning,

Hon Tanpa ma a ka din chiang in;

Mel in thei ning, mel in thei ning,

A khut a sikkilhna mel mu ning.”

Leitung ah ikithei ua, vangam ah ikithei sem ding uhi. Buaina ding himhim a omkei. Gingtu I ma a ana pai masate hi in, I nung a hongpaite hitaleh, Khrist a pumkhat suak in, unau khat bang in Pathian phat in I omkhawm ding hi. “Aw, nun in nuam nanchia maw tua van khopi…” I chilou theikei hi.

5. 8:11 ah Jesu’n sepaih zaheutu kiang ah “Kon hilh ahi, suahlam leh tumlam apat mi tampi a hongpai ding ua, vangam ah Abrahamte, Isaakte, Jakobte kiang ah a tu ding ua,” ana chi hi. Vangam om dingdan gen ahi. Vangam I tun chiang a midang kisuak ding hilou in, leitung a I min leh hihna (unique DNA and identity) kisunzom ding ahihdan I mu thei hi. Leitung a Abraham pen vangam a Abraham a hihlai bang in, leitung a Muanpu pen vangam ah leng Muanpu hithou ding hi. Huaiziak in, ikitheilai tham ding a, min mahmah ale kisam lai ding ihi ichi ngam hi. Ikibatlouhna ding bel a bukim ihihna ahita ding hi.

6. Jesu a thohnawn khit in a nungzuite kiang ah bangzahvei hiam kilaak hi. Huai hunte ah, Emau lampi a nungzui nihte a kitheihsaklouh (a thilhihtheihna zang a) chihlouh hundangte ah amuh un thei pahmai uhi. Hiai a muhchetna ziak mah un Khrist Tanchinhoih pen thudik ahina chih muangngam ua, sihpih ngam uhi. Khelhna in a sukkhak nawnlouh taksa zaw khelhna kolbun taksa toh a teh theihkei ding; a hoih zawtham ding a, himahleh Toupa’n michih hihna tuam vilvel (unique identity) a honpiak pen kikembit ding hi.

7. 26:29 ah Jesu’n a nungzuite kiang ah “ka Pa gam a nou toh a thak ka dawn ni a tun masiah tuban grepgui gah apan ka dawn nawnta kei ding” chi hi. Amah leitung thilte ne a dawn nawnlou ding in ana pai masa ding a, nungzuite leng ama kiang a tun chiang ua, hiai kithuahkhawmna pen sunzom ding uh ahihdan genna ahi. Hiai in vangam a ikitheihtuah lai ding dan a hon etsak kia hilou in, leitung a I kithuahnate (a hoihloute om nawnlou, a hoih bukim hita in) kisunzom ding ahihdan hon hilh hi.

8. Kilakna 20:15 leh 21:27 chihte ah Pathian tate min Hinna Laibu a kigelh ahihdan I mu hi. Hiai a min kigelhte I leitung minte (earthly names) mah ahi ding chih mailouh a genchetna ding dang omlou hi. Toupa’n I min chiat in hon thei hi. Ginna ziak a martyr a ana si misiangthoute Toupa mai ah “ka sisan phu uh chik chia la ding na hia?” chi in kikou uh chih leng I mu hi (Kil.6:10). Hiai apan in leng leitung a I hihna leh gamtat te vangam a leng kitheilai ahihdan a chiang hi. I sih chiang a I leitung hihna tengteng mang a, a thak a kipan ding hileh vangam a lawmman hawmna chih in omzia neilou ding a, gawtmun lutna ding ziak leng omlou ding hi. Huaiziak in Toupa kipahna leh a hehna (vaihawmna) om ahihna lel in leng tuni a I panna (argument) pen namkip mahmah in I thei hi.

Hiai I dawnna pen a bukim ahikei hi. Gelhbeh theih ding tampi omlai ding hi. Himahleh hiaiteng in leng vangam a leitung a ikitheihtuah bang a mimal a kitheituah lai ding ihi chih chiang huntawk in I thei hi. Mi khenkhat in “Huchi a kithei ding ihihleh, I sungkuante vangam hong kailou bang omleh, vangam a le I kipahna bukimlou ding chihna a diam?” chih dotna a nei uhi. Vangam I tun chiang in thil hoihlou leh thuhoihlou in mun nei nawnlou ding hi. Gawtmun ah bel mihausapa bang in kisikna leh poisakna tam mah inteh. Himahleh vangam ah bel huaite sukbuai in ki omlou ding hi.

Simtute, I it leh ngaih honna paisan masate phawk a ngai mahmah bang leng I omtham ding hi. Eric Clapton in a tapa a suun, it mahmah in “Would you hold my hand, If I saw you in heaven” chi’n laa ana awi hi. I it leh ngaihte toh vangam ah ikithei lai diam? Honna dawn ding uam? I dawnna tuh: “Hi” chih ahi. Nikhat tei ei leng I paisam ding a, I Hondampa Jesu Khrist ngei in vangam kongkhak a honna dawn chiang in nuam nan chia maw… I lut ding a, I kim leh kiang I en ding a, I mihing mit in a muh ngeilouh, I suangtuahna in a batlouh khop a etlawm mun ahita ding. Cancer, diabetes, BP buaina, tha na, guhna, gim leh tawl a om nawnkei ding. Ana pai masa I nu hiam, I pa hiam, I sanggamte, I tate toh ikimu ding a, ka gelh dingdan le ka thei tuankei, mihing laimal in a nop dingdan a gen theikei. Vangam ah khitui aluang lai diam? Kilakna 21:4 ah “Huan a mit ua kipan khitui tengteng a nulhul dia…” a kichi. Vangam a sihna, damlouhna leh lungkhamnate om nawnlou ding ahihman in dahna khitui omlou ding hi. Himahleh vangam ah khitui omlai ding in ka gingta: kipahluatna khitui. Hiai khitui nasan Toupa’n a hon nulhul saklai ding a, huchi in I it leh ngaihte leh ginna a I inkuanpih pauchih-namchih a kipante toh Toupa khebul ngei ah I nunnuam tawntungta ding hi.

Mel a thei ding hi hang…

Toupa’n simtute hon vualzawl hen aw.